د توبي بلاګ درنو لوستونكو!د توبي بلاګ د شخصيت پيژندلو لړي پيل كړي, له هر چاسره چي د كومي ملي او اسلامي څټي ژوند ليك وي نو زموږ څخه يي مه سپموي.ليكونه مو په دي ايميل راليږي: zahid.jalaly@gmail.com

محترم جلالي صاحب!
هيله ده چه زما سلامونه او نېكې هيلې ومنۍ. د مرحوم الفت صاحب بيوگرافي يا لنډه پيژندنه تاسو ته دخپرونې لپاره وړاندې كوم . ستاسو د برياليتوب په هيله.
حبيب الرحمن الفت 

______________________________________

د مرحوم استاد الفت صاحب ژوند ليك!

ارواښاد ګل پاچا الفت د پښتو ژبې لوى شاعر او پياوړى ليكوال، د خداى بخښلى مير سيد پاچا ځوى  دى، چه په ۱۲۸۸ هجري ش. كال، دافغانستان د لغمان ولايت د قرغيو ولسوالى د عزيز خان په كڅ  كې زيږېدلى دى. خداى بخښلى الفت  صاحب د هغه وخت د تعليمي رسم سره سم د ديني او عربي علومو مروجه تعليم د جومات نه پيل كړ، او د هغه خاصې ذكاوت او استعداد له بركته چه خداى (ج)وركړى ؤ، په ډير لږ وخت كې د صرف، نحو، فقه، منطق، فلسفه، حديث او تفسير كتابونه د هغه وخت له مشهورو استادانو څخه وويلې. د ديني متداوله علومو د پاى ته رسولو او شخصي مطالعو نه وروسته، الفت صاحب  په ۱۳۱۴ هجري ش. كال كې د انيس د ملي ورځپاڼې  په دفتركې د كاتب په حيث مقررشو.

په ۱۳۲۸ هجري ش. كال، د شورا په  اوومه دوره كې، الفت صاحب د ننګرهار د خلكو لخوا د وكيل په حيث انتخاب او  په شورا كې د دويم معين په توګه و ټاكل شو. په كال ۱۳۳۱ د شورا په اتمه دوره كې الفت صاحب  د لغمان د قرغيو ولسوالي د خلكو لخوا وكيل انتخاب شو.

ارواښاد الفت صاحب د رسمي ماموريت، شاعري او ليكوالي تر څنګ په سياست كښې هم فعال و. په كال ۱۳۳۰ هجري ش. كښې الفت صاحب د ولس ملي جريده تاسيس او د ۱۳۳۲ كال تر پايه  ددغه جريدې د امتياز خاوند و چې د ولس ملي جريده د لوستونكو د شمير له مخې د هغه وخت د ډيرو لويو آزادو  ملي  جرايدو څخه ګڼل كيده.

د ۱۳۳۴ هجري ش. كال په لويه جرګه كې، مرحوم الفت صاحب د ننګرهار د خلكو لخوا وكيل شو.

په كال ۱۳۳۵ هجري ش. كښې الفت صاحب د پښتو ټولنې د رئيس په حيث و ټاكل شو او وروستى رسمي ماموريت ئې د ډاكټر محمد يوسف په كابينه كې  په كال ۱۳۴۳ هجري ش.د قبائلو مستقل رياست و. الفت صاحب  د رسمي ماموريت په څنګ كې  د كابل پوهنتون د ادبياتو او حقوقو په پوهنځيو كښې د پښتو ژبې استاد هم و.

په كال ۱۳۴۳ هجري ش. كال الفت صاحب د قبائلو د مستقل رياست نه استعفىٰ وكړ او د شورا په دولسمه دوره كې بيا دننګرهار د وكيل په حيث انتخاب شو چه تقريباً ۳۴ كاله د دولت  د رسمي مامور او د شورا د وكيل  په توګه  په خدمت بوخت ؤ.

الفت صاحب  نه يواځې د خاص ذكاوت او استعداد خاوند ؤ، بلكه  دليكوالى د خاص قدرت او شعري روانې قريحې  څښتن هم ؤ. الفت صاحب په رسمي ماموريت  سربيره، ديني، اجتماعي، سياسي، او انتقادي شعرونه او مضامين وليكل او  كتابونه او علمي رسالې تاليف كړ، چه ځينې تاليفات يې مطبوعاتي جوائز هم ګټلي.دي.

دا د پښتو ژبې شاعر او ليكوال په دري ژبه هم شعرونه اومضامين ليكلي چه له بده مرغه ددوى دري اشعار اوس په لاس كښې ندي. د ارواښاد الفت صاحب تاليفات د نظم، نثر او ترجمې  پنځويشت كتابونو ته رسيږي، چه ځينې كتابونه يې تر اوسه ندي چاپ شوي. د استاد الفت آثار په خواشينى سره تر اوسه په بهرنيو ژبو هم ترجمه شوي ندي.

الفت صاحب يو متواضع، حليم، خاموش او لږ ويونكى سړى و. بې ضرورته خبرې يې نه كولې او تل به يې د بل خبرو ته غوږ ايښود، ډيره ظريفه طبع يې لرله او په ټوقو كښې يې هم ادبي نكات پراته و.

دمرحوم الفت صاحب په شخصيت، شاعرۍ او ليكوالۍ،د دوى دوستانو، شاعرانو او ليكوالو ډير په زړه پورې  مطالب  ليكلي دي، اما د الفت صاحب  د معرفي او پيژندلو لپاره ښه او يواځينى  وسيله د دوى خپل آثار دي.

الفت صاحب په ليكوالۍ او شاعرۍ كښې  د يو خاص سبك  خلاق ؤ. دده دنثرونو او شعرونو  لوى خصوصيت سادګي او رواني ده، چه دا خاصيت ددوى ليكنې او اشعار د نورو شاعرانو او ليكوالو د شعر او نثر نه بيلوي. دالفت شعرونه او نثرونه  فصاحت او بلاغت لري  او خاص او عام بې تكليفه په مطلب پوهيږي او هر څوك د خپل ذوق په اندازه خوند ورنه اخلي.

الفت صاحب  په خپل  ساده او روان  شعرونو او نثرونو، لوستونكي د ژوند هغو حقايقو ته متوجه كوي، كوم چه  دمخه تر دې څوك ورته ندي متوجه شوي.

د ارواښاد الفت شخصيت اود ژوند طريقه د هغوى د پوهې او علميت ښكارندوى ؤ. په ظاهر او باطن كښې يې فرق نه ؤ. الفت صاحب د عمل سړى او د انساني او اسلامي اخلاقو نمونه او مثال ؤ.

د مرحوم الفت صاحب  دشعرونو اوليكنو زياته برخه، اجتماعى او سياسي انتقادونه او د ټولنې د نيمګړتياوو د سمون په لور دعوت دى.د مسكينانو، بيوزلو او يتيمانو سره همدردي هم د الفت صاحب په شعرونو كښې ډير زيات دى. اسلامي جهاد د الفت صاحب په ليكنو كې لوى ځاى لري او ديني او مذهبي اشعار يې په قرآن او نبوي احاديثو متكي دي.

الفت صاحب دخپل خدمت په وخت كښې د خوشحال خان ادبي جائزه او د ابوعلى سينا علمي جائزه  لاس ته راوړى او دمعارف دويمه او د ستورى دريمه  درجه نښانونو او ددويمې تقدير نامې په اخستلو هم بريالى شويدى.

د الفت صاحب ډير وخت په مطالعه او ليكلو تيريده. الفت صاحب د خپل ژوند په آخرو وختونوكښې(د محمد داؤد خان د جمهوريت په وخت كښې) د افغانستان د سياسي او اجتماعي وضعې نه ډير زيات كړيده او د هغه وخت د نا مناسبې وضعې د اصلاح د پاره ډير كوښښونه وكړ، اما  سردار محمد داؤد خان چه د پرچميانو او كمونستانو لخوا محاصره شوى ؤ، سره له پخوانى  پيژندنې  او احترام، چه  الفت صاحب ته يې لرله، نه يې الفت صاحب ته د ليدلو وخت وركړ او نه يې د الفت صاحب ليك ته ( چه د هغه وخت د نا منا سبې وضعې او دهغه  د خطراتو په برخه  ليكل شوى ؤ)،  توجه وكړ.

الفت  د خپل عمر  آخر وختونه د عزيز خان په كڅ كښې  چه دده  د زيږيدلو ځاى دى تيرول، تر څو چه  د۱۳۵۶ كال د ليندى د مياشتې په ۲۸ نيټه  د زړه د حملې په اثر د ۶۷  كلنى په عمر وفات شو، او ددوى په پلرنى هديره كښې چه د كابل جلال آباد د سړك په څنګ پروت دى  خښ شو.   خداى (ج) دې وبخښي.